ಹಾವು ಕಡಿದು ಬಾಲಕಿ ಸಾವು

ಕುಣಿಗಲ್: ಹುಟ್ಟು ಹಬ್ಬಾಚರಣೆಗೆ ಸಿದ್ಧತೆ ನಡೆಸಿದ್ದ ಮನೆಯಲ್ಲಿ ಹುಟ್ಟುಹಬ್ಬ ಆಚರಿಸಿಕೊಳ್ಳಬೇಕಿದ್ದ ಬಾಲಕಿ ಹಾವು ಕಡಿದು ಮೃತಪಟ್ಟ ಕಾರಣ ಸೂತಕದ ಛಾಯೆ ಆವರಿಸಿದ ಮನ ಕಲಕುವ ಘಟನೆ ನಡೆದಿದೆ.
ಹುಲಿಯೂರು ದುರ್ಗ ಪೊಲೀಸ್ ಠಾಣಾ ವ್ಯಾಪ್ತಿಯ ಸಂತೇಮಾವತ್ತುರು ಸಮೀಪದ ಪಂಚವಟಿ ತಾಂಡದಲ್ಲಿ ಗಾರೆ ಕೆಲಸ ಮಾಡುವ ಶಂಕರನಾಯಕ, ಕವಿತಾ ಬಾಯಿ ದಂಪತಿಗೆ ಚೈತನ್ಯಬಾಯಿ (9) ಒಬ್ಬಳೆ ಮಗಳಿದ್ದು ಅಕ್ಟೋಬರ್ ಐದರಂದು ಆಕೆಯ ಹುಟ್ಟು ಹಬ್ಬಾಚರಣೆಗೆ ಮನೆಯಲ್ಲಿ ಸಿದ್ಧತೆ ನಡೆಸಲಾಗಿತ್ತು, ಚೈತನ್ಯಬಾಯಿ ತಾಂಡದಲ್ಲೆ ಇದ್ದ ಸರ್ಕಾರಿ ಕಿರಿಯ ಪ್ರಾಥಮಿಕ ಶಾಲೆಯಲ್ಲಿ ನಾಲ್ಕನೆ ತರಗತಿ ವ್ಯಾಸಂಗ ಮಾಡುತ್ತಿದ್ದಳು.
ಶನಿವಾರ ಬೆಳಗಿನ ಜಾವ ಮನೆಯಿಂದ ಹೊರ ಬಂದಾಗ ಕೈಗೆ ಏನೋ ಕಚ್ಚಿದ ಹಾಗೆ ಭಾಸವಾಗಿದ್ದು, ಮನೆಯೊಳಗೆ ಬಂದು ತಾಯಿಗೆ ತೋರಿಸಿದಾಗ ತಾಯಿ, ಗಾಯ ನೋಡಿ ಹಾವು ಕಚ್ಚಿದ ಗುರುತಾದ್ದರಿಂದ ಚಿಕಿತ್ಸೆಗೆ ಪಟ್ಟಣದ ಸಾರ್ವಜನಿಕ ಆಸ್ಪತ್ರೆಗೆ ಕರೆತರುವ ಮಾರ್ಗ ಮಧ್ಯದಲ್ಲೆ ಬಾಲಕಿ ಮೃತಪಟ್ಟಿದ್ದಾಳೆ, ಹುಟ್ಟು ಹಬ್ಬಾಚರಣೆಯ ಸಂಭ್ರಮದಲ್ಲಿದ್ದ ಮನೆ ಸೂತಕ ಆವರಿಸಿದ್ದು, ಆಸ್ಪತ್ರೆ ಆವರಣದಲ್ಲಿ ಮೃತ ಬಾಲಕಿಯ ಪೋಷಕರ ಆರ್ತನಾದ ಮನ ಕಲುಕುವಂತಿತ್ತು.