ಚೆಕ್ ಡ್ಯಾಂ ನಿರ್ಮಾಣಕ್ಕೆ ಎಂಟಿಕೆಯಿಂದ ಗುದ್ದಲಿಪೂಜೆ

ತುರುವೇಕೆರೆ: ತಾಲೂಕಿನ ಚಂಡೂರು ಪುರ ಬಳಿ ಸಣ್ಣ ನೀರಾವರಿ ಇಲಾಖೆಯ 120 ಲಕ್ಷ ರೂ. ವೆಚ್ಚದ ಚೆಕ್ ಡ್ಯಾಂ ನಿರ್ಮಾಣ ಕಾಮಗಾರಿಗೆ ಶಾಸಕ ಎಂ.ಟಿ.ಕೃಷ್ಣಪ್ಪ ಗುದ್ದಲಿಪೂಜೆ ನೆರವೇರಿಸಿದರು.

ಆ ನಂತರ ಮಾತನಾಡಿದ ಶಾಸಕ ಎಂ.ಟಿ.ಕೃಷ್ಣಪ್ಪ, ಸಣ್ಣ ನೀರಾವರಿ ಇಲಾಖೆಯ ಸುಮಾರು 5 ಕೋಟಿ ಪ್ಯಾಕೇಜ್ ನೀರಗುಂದ, ಬೊಮ್ಮೇನಹಳ್ಳಿ, ಪುರ ಹಾಗೂ ಕುನ್ನಾಘಟ್ಟ, ಸಿ.ಎಸ್.ಪುರ ಬಳಿ ಚೆಕ್ ಡ್ಯಾಂ ನಿರ್ಮಾಣ ಕಾಮಗಾರಿ ಒಳಗೊಂಡಿದೆ, ಬೊಮ್ಮೇನಹಳ್ಳಿಯಲ್ಲಿ 180 ಲಕ್ಷ ರೂ. ಹಾಗೂ ಪುರದಲ್ಲಿ 120 ಲಕ್ಷ ರೂ. ವೆಚ್ಚದ ಕಾಮಗಾರಿಗಳಿಗೆ ಚಾಲನೆ ನೀಡಲಾಗಿದ್ದು, ಶೀಘ್ರದಲ್ಲಿ ನೀರಗುಂದ ಆಸುಪಾಸಿನ ಜನರ ಬಹುನಿರೀಕ್ಷಿತ ಚೆಕ್ ಡ್ಯಾಂ ಕಂ ಬ್ರಿಡ್ಜ್ ನಿರ್ಮಾಣಕ್ಕೆ ಚಾಲನೆ ನೀಡಲಾಗುವುದು ಎಂದರು.

ಗುತ್ತಿಗೆದಾರರು ಕಾಮಗಾರಿ ನಿರ್ವಹಣೆ ವೇಳೆ ಉತ್ತಮ ಗುಣಮಟ್ಟ ಕಾಪಾಡಿಕೊಳ್ಳುವಂತೆ ಸೂಚನೆ ನೀಡಿದ ಶಾಸಕರು ಚೆಕ್ ಡ್ಯಾಂ ನಿರ್ಮಾಣದಿಂದ ನೀರು ಶೇಖರಣೆಗೊಂಡು ಅಂತರ್ಜಲ ವೃದ್ಧಿಯಾಗುವ ಮೂಲಕ ರೈತರ ಕೃಷಿ ಬದುಕು ಹಸನಾಗಲಿ ಎಂದರು.

ಈ ಸಂದರ್ಭದಲ್ಲಿ ಗ್ರಾಪಂ ಸದಸ್ಯ ನಂಜುಂಡಪ್ಪ, ಎಪಿಎಂಸಿ ಮಾಜಿ ಅಧ್ಯಕ್ಷ ವಿಜಯೇಂದ್ರ, ವಕೀಲ ನವೀನ್, ಮುಖಂಡ ಮಾದಿಹಳ್ಳಿ ಕಾಂತರಾಜ್, ಎಇ ಮಧುಸೂಧನ, ಗುತ್ತಿಗೆದಾರ ಬೆಟ್ಟದ ತಿಮ್ಮಪ್ಪ ಹಾಜರಿದ್ದರು.