ಜ್ಞಾನ ದೊಡ್ಡ ಜವಾಬ್ದಾರಿ ಕಲಿಸುತ್ತೆ

ತುಮಕೂರು: ಜ್ಞಾನದ ಅನ್ವೇಷಣೆಯು ಏಕಾಂಗಿ ಪ್ರಯತ್ನವಲ್ಲ, ಜ್ಞಾನದಿಂದ ದೊಡ್ಡ ಜವಾಬ್ದಾರಿ ಬರುತ್ತದೆ, ಹಾಗಾಗಿ ಭವಿಷ್ಯ ರೂಪಿಸುವ ಶಕ್ತಿ ಶಿಕ್ಷಣಕ್ಕಿದೆ ಎಂದು ಯುರೋಫಿನ್ಸ್ ಐಟಿ ಸಲ್ಯೂಷನ್ಸ್ ಇಂಡಿಯಾ ಪ್ರೈ. ಲಿಮಿಟೆಡ್ನ ವ್ಯವಸ್ಥಾಪಕ ನಿರ್ದೇಶಕ ಹರೀಶ್ ರವಿ ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.

ನಗರದ ಶ್ರೀಸಿದ್ದಗಂಗಾ ತಾಂತ್ರಿಕ ಮಹಾ ವಿದ್ಯಾಲಯದಲ್ಲಿ ನಡೆದ 14ನೇ ಪದವಿ ಪ್ರದಾನ ಸಮಾರಂಭದಲ್ಲಿ ಮುಖ್ಯ ಅತಿಥಿಗಳಾಗಿ ಭಾಗವಹಿಸಿ ಘಟಿಕೋತ್ಸವ ಭಾಷಣ ಮಾಡಿ, ವಿದ್ಯಾರ್ಥಿಗಳಾದ ನೀವು ಜ್ಞಾನೋದಯದ ರೂವಾರಿಗಳು, ನಾವೀನ್ಯತೆಯ ಚಾಂಪಿಯನ್ಗಳು ಮತ್ತು ಉತ್ತಮ ನಾಳೆಯ ನಿರ್ವಾಹಕರು ಎಂದರು.
ಪ್ರತಿಯೊಬ್ಬ ಮನುಷ್ಯ ಜಗತ್ತಿಗೆ ಕಾಲಿಡುತ್ತಿದ್ದಂತೆ ಸವಾಲು, ಅವಕಾಶ ಎದುರಾಗುತ್ತವೆ, ಪ್ರತಿ ಹಿನ್ನಡೆಯು ಒಂದು ಪಾಠವಾಗಿದೆ, ಹಾಗೆಯೇ ಪ್ರತಿ ಪ್ರಶ್ನೆಯೂ ಸಂಭಾವ್ಯ ಪ್ರಗತಿಯಾಗಿದೆ ಎಂಬುದನ್ನು ಯಾರೂ ಮರೆಯಬಾರದು, ಸತ್ಯಕ್ಕೆ ನಿಮ್ಮ ಬದ್ಧತೆ ಅಚಲವಾದ ಬುನಾದಿಯಾಗಲಿ ಎಂದು ಹರೀಶ್ ರವಿ ನುಡಿದರು.

ವಿದ್ಯಾರ್ಥಿಗಳಾದ ನೀವು ಕಲಿಕೆ ಮತ್ತು ಅನ್ವೇಷಣೆಯ ಪರಂಪರೆ ಕೊಂಡೊಯ್ಯುತ್ತೀರಿ, ನಿಮ್ಮ ಹೆಜ್ಜೆಗಳನ್ನು ಅನುಸರಿಸುವ ಪೀಳಿಗೆಗೆ ಜ್ಯೋತಿ ರವಾನಿಸುವ ಉದಾತ್ತ ಕರ್ತವ್ಯವನ್ನು ನೀವು ಈಗ ನಿರ್ವಹಿಸುತ್ತಿದ್ದೀರಿ ಎಂದ ಅವರು ಗಡಿಗಳು, ಶಿಸ್ತುಗಳು ಮತ್ತು ತಲೆಮಾರುಗಳಾದ್ಯಂತ ಮನಸ್ಸುಗಳನ್ನು ಒಂದುಗೂಡಿಸುವ ಸಾಮೂಹಿಕ ಧ್ಯೇಯವಾಗಿದೆ ಎಂಬುದನ್ನು ಎಂದಿಗೂ ಮರೆಯಬಾರದು, ಸಂಶೋಧನೆಯ ಜ್ಯೋತಿಯನ್ನು ವಿಭಿನ್ನವಾಗಿ ಸಾಗಿಸುವಿರಿ ಎಂಬುದರಲ್ಲಿ ನನಗೆ ಸಂದೇಹವಿಲ್ಲ, ನೀವು ಜಗತ್ತನ್ನು ಊಹಿಸಲಾಗದ ರೀತಿಯಲ್ಲಿ ರೂಪಿಸುವ ಶಕ್ತಿ ಹೊಂದಿದ್ದೀರಿ, ಆದ್ದರಿಂದ, ಧೈರ್ಯ ಮತ್ತು ದೃಢ ವಿಶ್ವಾಸದಿಂದ ಮುಂದೆ ಸಾಗಬೇಕು ಎಂದು ಸಲಹೆ ನೀಡಿದರು.

ಎಸ್ಐಟಿ ನಿಜಕ್ಕೂ ಮಹತ್ವದ ಸಂಸ್ಥೆಯಾಗಿದ್ದು, ಅನೇಕ ಯುವ ಸಾಧಕರ ಜೀವನ ರೂಪಿಸಿದೆ, ಶಿಕ್ಷಣ, ಸಾಮರಸ್ಯ ಮತ್ತು ಶ್ರೇಷ್ಠತೆ ಉತ್ತೇಜಿಸುವ ಮೂಲಕ ಸಮಾಜಕ್ಕೆ ದೊಡ್ಡ ಕೊಡುಗೆ ನೀಡಿದೆ, ಉನ್ನತ ದರ್ಜೆಯ ಇಂಜಿನಿಯರ್ಗಳು, ಚಿಂತಕರು, ಸುಧಾರಣಾವಾದಿಗಳು, ನೀತಿ ನಿರೂಪಕರು, ರಾಜಕಾರಣಿಗಳು ಮತ್ತು ಇನ್ನೂ ಅನೇಕರನ್ನು ಉತ್ಪಾದಿಸಲು ಈ ನಿಸ್ವಾರ್ಥ ಸಮಾಜ ಸೇವೆ ಇನ್ನೂ ಹಲವು ದಶಕಗಳ ವರೆಗೆ ಮುಂದುವರಿಯಲಿ ಎಂಬ ಆಶಯವನ್ನು ಹರೀಶ್ ರವಿ ವ್ಯಕ್ತಪಡಿಸಿದರು.

ಕಾರ್ಯಕ್ರಮದ ಸಾನಿಧ್ಯ ವಹಿಸಿದ್ದ ಸಿದ್ದಗಂಗಾ ಮಠಾಧ್ಯಕ್ಷ ಸಿದ್ದಲಿಂಗ ಸ್ವಾಮೀಜಿ ಮಾತನಾಡಿ, ಶಿಕ್ಷಣ ನಿಮ್ಮ ಬುದ್ಧಿಶಕ್ತಿಯನ್ನು ಮಾತ್ರವಲ್ಲದೆ ನಿಮ್ಮ ವ್ಯಕ್ತಿತ್ವವನ್ನೂ ರೂಪಿಸುತ್ತದೆ, ನಿಮ್ಮ ಇಂಜಿನಿಯರಿಂಗ್ ಪದವಿ ಕೇವಲ ಪ್ರಮಾಣ ಪತ್ರವಲ್ಲ ಎಂಬುದನ್ನು ನೆನಪಿಡಿ, ಇದು ನಿಮ್ಮ ಸಾಮರ್ಥ್ಯದ ಸಂಕೇತವಾಗಿದೆ, ಇಂಜಿನಿಯರಿಂಗ್ ಶಿಸ್ತಾಗಿ ಸೇತುವೆಗಳನ್ನು ನಿರ್ಮಿಸುವುದು, ಸಾಫ್ಟ್ವೇರ್ ಅಭಿವೃದ್ಧಿಪಡಿಸುವುದು ಅಥವಾ ಅತ್ಯಾಧುನಿಕ ಗ್ಯಾಜೆಟ್ಗಳನ್ನು ವಿನ್ಯಾಸಗೊಳಿಸುವುದು ಮಾತ್ರವಲ್ಲ, ಇದು ನೈಜ ಜಗತ್ತಿನ ಸಮಸ್ಯೆ ಪರಿಹರಿಸುವುದು, ಜೀವನ ಸುಧಾರಿಸುವುದು ಮತ್ತು ಸಮಾಜದ ಮೇಲೆ ಶಾಶ್ವತ ಪ್ರಭಾವ ಬೀರುವುದಾಗಿದೆ, ನಾಳಿನ ಇಂಜಿನಿಯರ್ಗಳಾದ ನೀವು, ನಮ್ಮ ಜಗತ್ತು ಎದುರಿಸುತ್ತಿರುವ ಸವಾಲುಗಳನ್ನು ಎದುರಿಸಲು ಕೀಲಿ ಹಿಡಿದಿಟ್ಟುಕೊಳ್ಳಿ, ಹವಾಮಾನ ಬದಲಾವಣೆಯಿಂದ ಆರೋಗ್ಯ ರಕ್ಷಣೆ, ಹಸಿವಿನಿಂದ ಆಹಾರ ಭದ್ರತೆ ಮೂಲ ಸೌಕರ್ಯ ಅಭಿವೃದ್ಧಿಯಿಂದ ಶುದ್ಧ ಇಂಧನ ಪರಿಹಾರಗಳ ಜೊತೆಗೆ ಮಾನವೀಯತೆಯ ಸುಧಾರಣೆಗೆ ಕೊಡುಗೆ ನೀಡಲು ನಿಮ್ಮ ಜ್ಞಾನವನ್ನು ಉಪಯೋಗಿಸಿ ಎಂದು ಸಲಹೆ ನೀಡಿದರು.

ಕಾರ್ಯಕ್ರಮದ ಅಧ್ಯಕ್ಷತೆಯನ್ನು ಸಿದ್ದಗಂಗಾ ಶಿಕ್ಷಣ ಸಮೂಹ ಸಂಸ್ಥೆಗಳ ಅಧ್ಯಕ್ಷ ಟಿ.ಕೆ.ನಂಜುಂಡಪ್ಪ ವಹಿಸಿದ್ದರು, ಎಸ್ಐಟಿ ನಿರ್ದೇಶಕರಾದ ಡಾ.ಎಂ.ಎನ್.ಚನ್ನಬಸಪ್ಪ, ಡಾ.ಶಿವಕುಮಾರಯ್ಯ,ಉದ್ಯಮಿ ಡಾ.ಎಂ.ಸ್ವಾಮಿ, ಎಸ್ಐಟಿ ಪ್ರಾಂಶುಪಾಲ ಡಾ.ದಿನೇಶ್ ಇತರರು ಇದ್ದರು.