ಕಾರು ಅಪಘಾತದಲ್ಲಿ ಓರ್ವ ಸಾವು

ಕುಣಿಗಲ್: ಸರಕು ಸಾಗಾಣೆ ವಾಹನ ಹಾಗೂ ಮಾರುತಿ ಕಾರಿನ ನಡುವೆ ನಡೆದ ಅಪಘಾತದಲ್ಲಿ ಓರ್ವ ಸ್ಥಳದಲ್ಲಿ ಮೃತಪಟ್ಟು ಮತ್ತೊಬ್ಬರು ತೀವ್ರವಾಗಿ ಗಾಯಗೊಂಡ ಘಟನೆ ಶನಿವಾರ ಮಧ್ಯಾಹ್ನ ಚೌಡನ ಕುಪ್ಪೆ ಗ್ರಾಮದ ಹೆದ್ದಾರಿಯಲ್ಲಿ ನಡೆದಿದೆ.
ಮೃತಪಟ್ಟವರನ್ನು ರಾಮನಗರ ತಾಲೂಕು ಕೂಟಗಲ್ ಹೋಬಳಿಯ ಗುಂಗುರಹಳ್ಳಿಯ ಸಿದ್ದರಾಜು (35) ಎಂದು ಗುರುತಿಸಲಾಗಿದೆ, ಇವರು ಕುಟುಂಬ ಸಮೇತ ಹುಲಿಯೂರು ದುರ್ಗ ಸಮೀಪ ಇರುವ ಹುಲಿಯೂರಮ್ಮ ದೇವಾಲಯಕ್ಕೆ ಆಗಮಿಸುವಾಗ ಚೌಡನಕುಪ್ಪೆ ಗ್ರಾಮದ ಬಳಿ ಎಳನೀರು ತುಂಬಿಕೊಂಡು ಹೋಗುತ್ತಿದ್ದ ಸರಕು ಸಾಗಣೆ ವಾಹನಕ್ಕೆ ಡಿಕ್ಕಿಯಾಗಿದೆ, ಪತ್ನಿ ಅರ್ಪಿತ (30 ವರ್ಷ) ತೀವ್ರ ಗಾಯಗೊಂಡು ಚಿಂತಾ ಜನಕ ಸ್ಥಿತಿಯಲ್ಲಿದ್ದು, ಕುಣಿಗಲ್ ಸಾರ್ವಜನಿಕ ಆಸ್ಪತ್ರೆಯಲ್ಲಿ ಚಿಕಿತ್ಸೆ ನೀಡಿ, ಬೆಂಗಳೂರಿನ ನಿಮಾನ್ಸ್ ಆಸ್ಪತ್ರೆಗೆ ಕಳಿಸಲಾಗಿದೆ.
ಕಾರಿನಲ್ಲಿದ್ದ ನಾಲ್ಕು ವರ್ಷದ ಮಗು ಸುಶ್ಮಿತಾ ಹಾಗೂ ಒಂದು ವರ್ಷದ ಮಗು ಸಣ್ಣಪುಟ್ಟ ಗಾಯವಾಗಿದ್ದು ಹುಲಿಯೂರು ದುರ್ಗ ಪೊಲೀಸರು ಚೌಡನಕುಪ್ಪೆ ಗ್ರಾಮಸ್ಥರ ಸಹಕಾರದಿಂದ ರಕ್ಷಿಸಿದ್ದಾರೆ, ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.