ಮಳಿಗೆಗಳಲ್ಲಿ ಸರಣಿ ಕಳ್ಳತನ

ಕುಣಿಗಲ್: ಪಟ್ಟಣದ ಮುಖ್ಯರಸ್ತೆಯಲ್ಲಿನ ಮಳಿಗೆಗಳಲ್ಲಿ ಸರಣಿ ಕಳ್ಳತನ ನಡೆಯುವ ಜೊತೆಯಲ್ಲಿ ಮನೆಯೊಂದರ ಮುಂದೆ ನಿಲ್ಲಿಸಲಾಗಿದ್ದ ಬೈಕ್ ಕಳುವು ಮಾಡಿದ್ದು ನಾಗರಿಕರಲ್ಲಿ ಆತಂಕ ಸೃಷ್ಟಿಸಿದೆ.
ಪಟ್ಟಣದ ಸಾರಿಗೆ ಸಂಸ್ಥೆ ಬಸ್ ನಿಲ್ದಾಣದ ಮುಂಭಾಗದಲ್ಲಿರುವ ಹೆದ್ದಾರಿಗೆ ಹೊಂದಿಕೊಂಡಿರುವ ಬಟ್ಟೆ ಅಂಗಡಿಯ ಎರಡನೆ ಅಂತಸ್ತಿನ ಶೋ ಕೇಸ್ ಗಾಜು ಪುಡಿಮಾಡಿ ಒಳ ನುಗ್ಗಿರುವ ಕಳ್ಳರು ನಗದು ದೋಚಿದ್ದಾರೆ, ಇದೆ ರಸ್ತೆಯಲ್ಲಿ ಪೊಲೀಸ್ ಠಾಣೆಯ ಸ್ವಲ್ಪ ದೂರದಲ್ಲೆ ಇರುವ ಮತ್ತೊಂದು ಕಿರಾಣಿ ಅಂಗಡಿಯ ಬೀಗ ಮುರಿದು ಒಳನುಗ್ಗಿ ನಗದು ದೋಚಿದ್ದಾರೆ, ಇಲ್ಲಿಂದ ಕೆಆರ್ ಎಸ್ ಅಗ್ರಹಾರದ ಮುಖ್ಯ ರಸ್ತೆಯಲ್ಲಿನ ಪಾನಿಪುರಿ ಅಂಗಡಿಯ ಪಕ್ಕದ ಬುಕ್ ಸ್ಟಾಲ್ ನಲ್ಲೂ ಕೈಚಳಕ ತೋರಿಸಿ ನಗದು ದೋಚಿದ್ದಾರೆ, ಮೂರು ಪ್ರಕರಣಗಳಿಗೆ ಸಂಬಂಧಿಸಿದಂತೆ ಮಾಲೀಕರು ಪೊಲೀಸರಿಗೆ ದೂರು ನೀಡಿದ್ದಾರೆ.

ಅಗ್ರಹಾರದ ಮನೆಯೊಂದರ ಮುಂದೆ ನಿಲ್ಲಿಸಿದ್ದ ಬೈಕ್ ನ್ನು ಸಹ ಕಳವು ಮಾಡಲಾಗಿದೆ, ಕಳವು ಮಾಡಿರುವ ದೃಷ್ಯ ಸಿಸಿ ಟಿವಿಯನ್ನು ಸೆರೆಯಾಗಿದ್ದು ಯುವಕನೊಬ್ಬ ಬೈಕ್ ನ ಹ್ಯಾಂಡಲ್ ಲಾಕ್ ಕಾಲಿನಿಂದ ಕಟ್ ಮಾಡಿ ಬೈಕ್ ತಳ್ಳಿ ಕೊಂಡು ಹೋಗುವ ದೃಶ್ಯ ಸೆರೆಯಾಗಿದೆ, ಕಳುವಿನ ವೀಡಿಯೋ ತುಣುಕು ಸಾಮಾಜಿಕ ಜಾಲತಾಣದಲ್ಲಿ ಹರಿದಾಡುತ್ತಿದೆ, ಒಂದೆ ರಾತ್ರಿ ಪಟ್ಟಣದ ಹೆದ್ದಾರಿಯ ಅಂಗಡಿಗಳಲ್ಲಿ ನಡೆದ ಸರಣಿ ಕಳ್ಳತನ ನಾಗರಿಕನ್ನು ಬೆಚ್ಚಿ ಬೀಳಿಸಿದ್ದರೆ ಪೊಲೀಸರಿಗೆ ತಲೆನೋವಿನ ಸಂಗತಿಯಾಗಿದೆ.