ಸರಿಗಮ ಖ್ಯಾತಿಯ ಮಂಜಮ್ಮ ನಿಧನ

ಮಧುಗಿರಿ: ಖಾಸಗಿ ವಾಹಿನಿಯ ಸರಿಗಮ ಖ್ಯಾತಿಯ ತಾಲೂಕಿನ ಕಸಬಾ ವ್ಯಾಪ್ತಿಯ ಡಿವಿ ಹಳ್ಳಿ ಗ್ರಾಮದ ಅಂಧರಾದ ಮಂಜಮ್ಮ, ರತ್ನಮ್ಮ ಪೈಕಿ ಮಂಜಮ್ಮ ಅನಾರೋಗ್ಯದಿಂದ ಬೆಂಗಳೂರಿನ ವಿಕ್ಟೋರಿಯಾ ಆಸ್ಪತ್ರೆಯಲ್ಲಿ ನಿಧನರಾಗಿದ್ದಾರೆ.

ಇವರು ಈ ಮೊದಲು ಶ್ರೀ ಮಾರಮ್ಮ ದೇವಸ್ಥಾನದ ಮುಂದೆ ದಂಡಿನ ಮಾರಮ್ಮನ ಹಾಡುಗಳನ್ನು ಹೇಳುತ್ತಿದ್ದರು, ಇದನ್ನು ಭಕ್ತರೊಬ್ಬರು ವೀಡಿಯೋ ಮಾಡಿ ಸಾಮಾಜಿಕ ಜಾಲತಾಣದಲ್ಲಿ ಪೋಸ್ಟ್ ಮಾಡಿದ್ದ ಹಿನ್ನೆಲೆಯಲ್ಲಿ ಇವರ ಹಾಡುಗಳು ವೈರಲ್ ಆಗಿದ್ದವು, ಇದರಿಂದ 2018 ರಲ್ಲಿ ಖಾಸಗಿ ವಾಹಿನಿಯ ಸರಿಗಮಪ ಗೆ ಆಯ್ಕೆಯಾಗಿ ಅಲ್ಲಿ ಇವರ ಹಾಡುಗಳು ವೀಕ್ಷಕರ ಗಮನ ಸೆಳೆದಿದ್ದವು, ಸರಿಗಮ ಕಾರ್ಯಕ್ರಮದಲ್ಲಿ ಹಾಜರಿದ್ದ ಚಿತ್ರ ನಟ ಹಾಗೂ ರಾಜ್ಯಸಭಾ ಸದಸ್ಯ ಜಗ್ಗೇಶ್ ರತ್ನಮ್ಮ ಮತ್ತು ಮಂಜಮ್ಮನವರಿಗೆ ವಾಸಕ್ಕೆ ಯೋಗ್ಯವಾದ ಮನೆ ಇಲ್ಲದಿರುವುದನ್ನು ಮನ ಗಂಡು 2019 ರಲ್ಲಿ ಅಭಿಮಾನಿಗಳ ಸಹಕಾರದೊಂದಿಗೆ ತಮ್ಮ ಸ್ವಂತ ಹಣದಿಂದ ಮನೆ ಕಟ್ಟಿಸಿಕೊಟ್ಟು ಮನೆಯ ಗೃಹಪ್ರವೇಶ ಕಾರ್ಯಕ್ರಮಕ್ಕೆ ದಂಪತಿ ಸಮೇತ ಆಗಮಿಸಿದ್ದನ್ನು ಇಲ್ಲಿ ಸ್ಮರಿಸಬಹುದು.

ನಂತರ ಖ್ಯಾತ ಸಂಗೀತ ನಿರ್ದೇಶನ, ಗಾಯಕ ಅರ್ಜುನ್ ಜನ್ಯ ಅವರು ಮಂಜಮ್ಮ ಮತ್ತು ರತ್ನಮ್ಮ ಅವರಿಗೆ ಪ್ರತಿ ದಿನಕ್ಕೆ ಬೇಕಾದ ಅಕ್ಕಿ ಬೇಳೆ ಸೇರಿದಂತೆ ಆಹಾರ ಪದಾರ್ಥಗಳನ್ನು ಪ್ರತಿ ತಿಂಗಳು ಕಳುಹಿಸಿ ಕೊಡುತ್ತಿದ್ದರು.