ಚಿರತೆ ದಾಳಿಗೆ ಕೋಳಿ, ಮೇಕೆ ಬಲಿ

ತುರುವೇಕೆರೆ: ಚಿರತೆಯ ದಾಳಿಗೆ ಮೇಕೆ ಹಾಗೂ 10 ಕ್ಕೂ ಹೆಚ್ಚು ಕೋಳಿ ಬಲಿಯಾಗಿರುವ ಘಟನೆ ಪಟ್ಟಣದ ಎಪಿಎಂಸಿ ಮಾರುಕಟ್ಟೆ ಹಿಂಭಾಗದ ಕೋಳಿ ಸಾಕಾಣಿಕ ಶೆಡ್ ನಲ್ಲಿ ನಡೆದಿದೆ.
ಎಪಿಎಂಸಿ ಕಟ್ಟಡದ ಹಿಂಭಾಗ ತಮ್ಮ ತೋಟದಲ್ಲಿ ಜಗದೀಶ್ ಎಂಬುವರು ಶೆಡ್ ನಿರ್ಮಿಸಿ ನಾಟಿ ಕೋಳಿ ಸಾಕಾಣೆ ಮಾಡುತ್ತಿದ್ದರು. ಕಳೆದ ರಾತ್ರಿ ಶೆಡ್ ಪ್ರವೇಶಿಸಿರುವ ಚಿರತೆ ಅಲ್ಲಿದ್ದ ಕೋಳಿಗಳ ಹಾಗೂ ಮೇಕೆ ಮೇಲೆ ದಾಳಿ ನಡೆಸಿದೆ, ದಾಳಿಯಿಂದಾಗಿ ಕೋಳಿಗಳು ಹಾಗೂ ಮೇಕೆ ಮೃತಪಟ್ಟಿವೆ. ಮಾಲೀಕ ಜಗದೀಶ್ ತಮ್ಮ ಶೆಡ್ ಬಳಿ ಕೋಳಿ ಹಾಗೂ ಮೇಕೆ ಸತ್ತು ಬಿದ್ದಿರುವುದು ಕಂಡು ವಿಷಯವನ್ನು ಅರಣ್ಯ ಇಲಾಖೆಗೆ ತಿಳಿಸಿದ್ದಾರೆ.
ಜನವಸತಿ ಪ್ರದೇಶಕ್ಕೆ ಹೊಂದಿಕೊಂಡಿರುವ ಪ್ರದೇಶದಲ್ಲಿ ಚಿರತೆ ದಾಳಿ ನಡೆಸಿರುವುದು ನಾಗರಿಕರನ್ನು ಬೆಚ್ಚಿ ಬೀಳಿಸಿದೆ. ಪಟ್ಟಣಕ್ಕೆ ಸನಿಹದಲ್ಲೆ ಸುಳಿದಾಡುತ್ತಿರುವ ಚಿರತೆಯನ್ನು ಅರಣ್ಯ ಇಲಾಖೆಯವರು ಸೆರೆ ಹಿಡಿಯುವಂತೆ ನಾಗರಿಕರು ಒತ್ತಾಯಿಸಿದ್ದಾರೆ.