ಮಳೆಗೆ ಮನೆಯ ಗೋಡೆ ಕುಸಿತ

ಹುಳಿಯಾರು: ಹುಳಿಯಾರು ಹೋಬಳಿಯ ಕೆಂಕೆರೆ ಗ್ರಾಮ ಪಂಚಾಯಿತಿ ವ್ಯಾಪ್ತಿಯ ಕೆ.ಸಿ.ಪಾಳ್ಯದಲ್ಲಿ ಭಾರಿ ಮಳೆಗೆ ಮನೆ ಗೋಡೆ ಕುಸಿದು ಅಪಾರ ನಷ್ಟ ಸಂಭವಿಸಿರುವ ಘಟನೆ ನಡೆದಿದೆ.
ಇಲ್ಲಿನ ಶಾರದಮ್ಮ ಸೋಮಶೇಖರ್ ಅವರ ಮನೆಯ 2 ಗೋಡೆ ಕುಸಿದಿದೆ. ಈ ಮನೆಯಲ್ಲಿ ಶೋಭಾ ಮಣಿಕಂಠ ಎಂಬುವವರು ಬಾಡಿಗೆ ವಾಸವಿದ್ದರು. ಕಳೆದ ಐದಾರು ದಿನಗಳಿಂದ ಭಾರಿ ಮಳೆಯಾಗುತ್ತಿರುವುದರಿಂದ ಮಳೆಯ ನೀರಿಗೆ ಮನೆ ಗೋಡೆ ನೆನೆದು ಶಿಥಿಲವಾಗಿತ್ತು.
ಸೋಮವಾರ ರಾತ್ರಿಯಿಡಿ ಭಾರಿ ಮಳೆಯಾಗಿದ್ದರಿಂದ ಮಂಗಳವಾರ ಬೆಳಗ್ಗೆ ಮನೆಯ ಎರಡೂ ಗೋಡೆಗಳು ಕುಸಿದಿದೆ. ಗೋಡೆ ಕುಸಿಯುವುದನ್ನು ಅರಿತ ವಾಸಿಗಳು ಮನೆಯಿಂದ ಹೊರಬಂದು ಪ್ರಾಣಾಪಾಯದಿಂದ ಪಾರಾಗಿದ್ದಾರೆ.
ಆದರೆ ಗೋಡೆ ಕುಸಿತದಿಂದ ಮನೆಯಲ್ಲಿದ್ದ ದವಸಧಾನ್ಯ, ಪಾತ್ರೆ, ಬಟ್ಟೆ ಸೇರಿದಂತೆ ಅನೇಕ ಗೃಹಪಯೋಗಿ ವಸ್ತುಗಳು ಜಖಂ ಆಗಿ ಅಪಾರ ನಷ್ಟವಾಗಿದೆ. ಶೋಭಾ ಅವರಿಗೆ ಸ್ವಂತ ಮನೆಯಿಲ್ಲದೆ ಬಾಡಿಗೆ ಮನೆಯಲ್ಲಿ ವಾಸವಿದ್ದರು, ಈಗ ಮನೆ ಮತ್ತು ಮನೆಯ ವಸ್ತುಗಳನ್ನು ಕಳೆದುಕೊಂಡಿರುವ ಇವರು ಅಕ್ಷರಶಃ ಬೀದಿಗೆ ಬಂದಿದ್ದಾರೆ. ಸಂಬಂಧಪಟ್ಟ ಅಧಿಕಾರಿಗಳು ಗಮನ ಹರಿಸಬೇಕೆಂದು ಮನವಿ ಮಾಡಿದ್ದಾರೆ.