ಬೀದಿ ಬದಿಯ ಚಹಾ ಅಂಗಡಿಗೆ ಬೆಂಕಿ

ಶಿರಾ: ಇಲ್ಲಿನ ಮುಖ್ಯ ಅಂಚೆಕಛೇರಿ ಪ್ರಾಂಗಣಕ್ಕೆ ಹೊಂದಿಕೊಂಡಂತೆ ಇದ್ದ ತಳ್ಳುಗಾಡಿಯ ಚಹಾ ಅಂಗಡಿಯೊಂದಕ್ಕೆ ಶುಕ್ರವಾರ ಬೆಳಗ್ಗೆ ಆಕಸ್ಮಿಕ ಬೆಂಕಿ ತಗುಲಿದ್ದು, ಕೆಲ ಕಾಲ ಆತಂಕಕ್ಕೆ ಕಾರಣವಾಗಿತ್ತು.
ಲಾಕ್‌ಡೌನ್ ಸಮಯದಿಂದಲೂ ಬೀದಿ ಬದಿಯ ಚಹಾ ಅಂಗಡಿಗಳು ಬಂದ್ ಆಗಿದ್ದು, ನಗರದ ಮುಖ್ಯ ಅಂಚೆ ಕಛೇರಿ ಮುಂಭಾಗದ ತಳ್ಳುಗಾಡಿಯ ಚಹಾ ಅಂಗಡಿಗೆ ಶುಕ್ರವಾರ ಬೆಂಕಿ ತಗುಲಿ, ಅಂಗಡಿ ಭಸ್ಮಗೊಂಡಿದೆ. ಈ ವೇಳೆ ಅಂಗಡಿಯಲ್ಲಿ ಇತ್ತು ಎನ್ನಲಾಗಿರುವ ಗ್ಯಾಸ್ ಸಿಲಿಂಡರ್ ಹೊತ್ತು ಉರಿದಿದ್ದು, ಭಾರೀ ಪ್ರಮಾಣದ ಶಬ್ಧದೊಂದಿಗೆ ಆಕಾಶದೆತ್ತರಕ್ಕೆ ಹೊರಟ ಬೆಂಕಿ ಜ್ವಾಲೆ ಗಮನಿಸಿದ ಜನರು ಸಿಲಿಂಡರ್ ಬ್ಲಾಸ್‌ಟ್‌ ಆಗಿರಬಹುದು ಎಂದು ಅಂದಾಜಿಸಿದ್ದಾರೆ.
ಇದೇ ಸಮಯಕ್ಕೆ ವಿಷಯ ತಿಳಿದ ಅಗ್ನಿಶಾಮಕ ದಳದ ಸಿಬ್ಬಂದಿ ಸ್ಥಳಕ್ಕೆ ಬಂದು ಬೆಂಕಿಯನ್ನು ನಂದಿಸುವಲ್ಲಿ ಯಶಸ್ವಿಯಾಗಿದ್ದಾರೆ. ಸಮೀಪದಲ್ಲೇ ಇದ್ದ ಪೊಲೀಸರು ಘಟನಾ ಸ್ಥಳಕ್ಕೆ ಸಾರ್ವಜನಿಕರು ಹೋಗದಂತೆ ತಡೆಯುವ ಮೂಲಕ ಹೆಚ್ಚಿನ ಅನಾಹುತ ಆಗದಂತೆ ರಕ್ಷಿಸಿದ್ದಾರೆ.