ದುಬಾರಿ ಬದುಕಿನ ಹಿಂದೆ ಸವಾರಿ ಬೇಡ!

ವರಲಕ್ಷ್ಮಿ ಮಹೇಶ್
167/B, ಹುಡ್ಕೋ ಕಾಲೋನಿ, ಭದ್ರಾವತಿ – 577301.
ಶಿವಮೊಗ್ಗ lvaralakshmi995@gmail.com

ಬದುಕಿನಲ್ಲಿ ನಾನು ಗೆದ್ದೆ! ಕಾರು, ಮನೆ, ಆಸ್ತಿ-ಪಾಸ್ತಿ ಎಲ್ಲವೂ ನನ್ನ ಬಳಿ ಇದೆ. ಇಡೀ ಜಗತ್ತು ನನ್ನ ಬೆರಳ ತುದಿಯಲ್ಲಿದೆ. ಮುಂದಿನ ನಾಲ್ಕು ತಲೆಮಾರು ಕೂತು ತಿನ್ನುವಷ್ಟು ಆಸ್ತಿ ಹೊಂದಿದ್ದೇನೆ ಎಂದು ಬೀಗುವವರಿಗೆ ಈಗ ಬ್ರೇಕ್ ಬಿದ್ದಿದೆ. ಎಷ್ಟೇ ಆದರೂ ಮನುಷ್ಯ ಅಲ್ಲವೇ? ಮನುಷ್ಯನ ದುಷ್ಟ ಸ್ವಭಾವವೇ ದುರಾಸೆ. ಎಷ್ಟೇ ಇದ್ದರೂ ಇನ್ನಷ್ಟು ಬೇಕು, ಮತ್ತಷ್ಟು ಬೇಕು ಎಂದು ಹಪಹಪಿಸುವ ಗುಣ. ಸಮಾಧಾನ, ಸಂತೃಪ್ತಿಗೆ ಬೇಲಿ ಹಾಕಿ ಕೊಳ್ಳದೆ ಇದ್ದರೆ ಇಂತಹದೊಂದು ಕೆಟ್ಟ ದಿನ ಬರುತ್ತದೆ ಎಂಬ ಅರಿವು ಇನ್ನಾದರೂ ಆಗಬೇಕಿದೆ.
ಆಸೆ ಇರಲಿ, ಇರಬೇಕಾದ್ದೆ! ಆದರೆ, ದುರಾಸೆಯಲ್ಲ. ತನ್ನ ಇತಿ-ಮಿತಿಗಳನ್ನು ಮೀರಿ ಬೆಳೆಯಲು ಹವಣಿಸುವ ಮನುಷ್ಯನ ಬುದ್ದಿಗೆ ಪ್ರಕೃತಿ ಹೀಗೂ ಲಗಾಮು ಹಾಕಬಹುದೆಂದು ತೋರಿಸಿಕೊಟ್ಟಿದೆ.
ಐಷರಾಮಿ ಜೀವನ ಸಾಗಿಸುತ್ತಿದ್ದ ಮನುಕುಲಕ್ಕೆ ಈಗ ಬೇಲಿ ಬಿದ್ದಿದೆ. ಹಣ ಇದ್ದರೆ ಏನು ಬೇಕಾದರೂ ಮಾಡಬಹುದೆಂಬ ಹುಂಬತನಕ್ಕೆ ಕಡಿವಾಣ ಹಾಕಿದೆ. ತಾನು ಮಾಡಿದ್ದೇ ಸರಿ ಎಂಬ ಅವಿವೇಕಿತನಕ್ಕೆ ಪೆಟ್ಟು ಬಿದ್ದಿದೆ. ಸದಾ ಮೋಜಿನಲ್ಲಿ ಮೈಮರೆತು ಪ್ರಕೃತಿ ಜೊತೆ ಚೆಲ್ಲಾಟವಾಡಿ, ಸ್ವಾಭಾವಿಕ ಪ್ರಕೃತಿಯನ್ನು ಹಾಳುಗೆಡವಲು ಹೊರಟವನಿಗೆ ಪಾಠ ಹೇಳುವಂತಾಗಿದೆ.
ಹೌದು, ದೈವದತ್ತವಾಗಿ, ಪ್ರಕೃತಿ ಸ್ವಭಾವಿಕವಾಗಿ ನೀಡುವ ಪ್ರತಿಯೊಂದನ್ನು ಆಸ್ವಾದಿಸಬೇಕು, ಪ್ರೀತಿಸಬೇಕು, ಆರಾಧಿಸಬೇಕು.. ಬೆರೆಯಬೇಕು. ಬೆರೆತ ಭಾವದಲ್ಲಿ ಸಂಭ್ರಮ ಇರಬೇಕು. ಸಂತೃಪ್ತಿ ಇರಬೇಕು. ಅದೇ ಅಲ್ಲವೇ ನಿಜವಾದ ಸೌಂದರ್ಯ, ಅದೇ ಅಲ್ಲವೇ ನಿಜವಾದ ಆಲಿಂಗನ. ಆದರೆ, ಮನುಷ್ಯ ಮೈಮರೆಯುತ್ತಿದ್ದಾನೆ, ಮೈ ಮರೆತು ಪ್ರಕೃತಿ ಜೊತೆ ಚೆಲ್ಲಾಟವಾಡಿದ್ದಕ್ಕೆ ನಮಗೀಗ ಈ ಬಂಧನ ಏರ್ಪಟಿದ್ದೆ. ಬಂಧನದಿಂದ ಮುಕ್ತವಾಗಲು ಇದೆಲ್ಲಾ ಮನುಷ್ಯ ಜೀವಿಗೆ ಅರ್ಥವಾಗಬೇಕು.. ಅರ್ಥಮಾಡಿಸಬೇಕು ಅಲ್ಲವೇ?

ಮನುಷ್ಯನ ಸದ್ದು ಅಡಗಿದೆ
ಇದೀಗ ಕೊರೊನಾ ಭೀತಿಯಿಂದ ಜಗತ್ತೇ ಲಾಕ್ ಆಗಿದೆ. ಎಲ್ಲೂ ಓಡಾಡುವಂತಿಲ್ಲ. ಓಡಾಡಿದರೆ ಬಿತ್ತು ಲಾತ ಎಂಬಂತಾಗಿದೆ. ಪ್ರಾಣಿ-ಪಕ್ಷಿಗಳು, ಗಿಡ-ಮರಗಳು, ವನ್ಯ ಮೃಗಗಳು ಈಗ ಎಲ್ಲವೂ ಸಂಭ್ರಮದಲ್ಲಿ ಕೇಕೆ ಹಾಕುತ್ತಿವೆ.. ಮನುಷ್ಯನ ಹೆಜ್ಜೆ ಗುರುತಾಗಲಿ, ಸದ್ದಾಗಲಿ ಅವುಗಳಿಗೆ ಕೇಳಿಸುತ್ತಿಲ್ಲ. ಅವುಗಳ ಸಂಭ್ರಮಕ್ಕೆ ಪಾರವೇ ಇಲ್ಲ ಎಂಬಷ್ಟು ಸಂತೃಪ್ತಿಯಲ್ಲಿವೆ, ಅವುಗಳನ್ನು ಅವುಗಳಾಗೆ ಇರಲು ಬಿಡುವಂತಹ ದೊಡ್ಡ ಮನಸ್ಸು ಮನುಷ್ಯನದ್ದಾಗಬೇಕು.. ಆದಾಗಲೇ, ಜಗತ್ತಿನ ಮತ್ತೊಂದು ರೂಪ ಅನಾವರಣಗೊಳುತ್ತದೆ.